Somo la 28 (Siku ya Pili ya Uumbaji 3) — Kiswahili
Usomaji wa Biblia: Mwanzo 1:6-8
“[6] Mungu akasema, Na liwe anga katikati ya maji, likayatenge maji na maji. [7] Mungu akafanya anga, akayatenga maji yaliyo chini ya anga na maji yaliyo juu ya anga; ikawa hivyo. [8] Mungu akaliita lile anga Mbingu. Ikawa jioni, ikawa asubuhi, siku ya pili.”
Ndugu wapendwa katika Bwana.
Watakatifu wote wa makanisa ya matawi na sehemu za ibada za hapa nchini, watazamaji wa GCN, na watoto wote wa Mungu mnaoshiriki ibada mtandaoni, karibuni. Hili ni somo la 28 katika mfululizo wa Mwanzo. Kazi za uumbaji wa siku sita zilifanyika katika mbingu ya kwanza, yaani, ulimwengu wa kimwili. Maana ya usemi “siku sita” ni sawa na kipindi cha siku sita tunachokifahamu sasa. Kwa hiyo, kazi ya kila siku ya uumbaji ilitokea ndani ya siku moja. Hili haliwezi kueleweka kwa kutumia dhana ya wakati ya wanadamu.
Kwa mfano, siku ya tatu bahari na nchi kavu viliumbwa, na mimea mbalimbali ikatokea juu ya nchi. Pia, siku ya nne ya uumbaji jua, mwezi na nyota viliumbwa. Kazi hizo za ajabu zingewezaje kufanyika ndani ya siku moja tu? Siku ya kwanza ya uumbaji, Mungu aliposema, “Iwe nuru,” ulimwengu wa roho uliozungukwa na nuru ya asili uliongezwa kwenye ulimwengu wa kimwili. Nafasi ya roho inapoongezwa kwenye nafasi ya mwili, eneo hilo linakuwa eneo la kiroho. Mtaelewa mambo haya kupitia makala na ishara nyingi zitakazotokea baadaye. Nafasi iliyozungukwa na nuru ya asili ya uumbaji ina sifa za mbingu ya nne, ambako Mungu wa Utatu anakaa; yaani, ni nafasi ya vipimo vinne.
Mambo hutukia kama vile Mungu Baba alivyoyakusudia moyoni Mwake na kwa jinsi anavyoyatamka kwa sauti ya asili. Katika nafasi iliyozungukwa na nuru ya asili ya uumbaji, si sifa zake tu bali pia mtiririko wa wakati wake ni sawa na ule wa vipimo vinne. Kwa hiyo, hata katika mbingu ya kwanza, yaani, ulimwengu wa kimwili, mtiririko wa wakati wa mbingu ya nne hutumika katika sehemu iliyozungukwa na nuru ya msingi ya uumbaji.
